Sali trempan for di cas y no warda te ultimo momento pa asina bo tin cu core cu velocidad halto.

No parkeer bo auto den centro di cuidad. Corda cu na tur momento Polis, Brandweer, Ambulance y Rode kruis mester por yega den centro di ciudad. No bloquia ningun cruzada.

Sigui instruccion di polis. Polis tey pa yuda y si bo coöpera, nos Carnaval lo termina bon y sigur.

No parkeer dilanti di entrada of salida, corda cu otronan mester por sali. Por ehempel: hende cu mester bay dokter, trabou y otronan cu mester traha warda.

Si bo ta para un trailer of un stage canto di caminda, zorg pa bo no viola e reglanan stipula door di Comisario di Polis.

No subi, sinta ni para ariba propiedad di otro hende, manera muraya, dak, negoshi of lugarnan peligroso riba e ruta

Hendenan grandi riba e ruta mester tene cuenta cu e muchanan chiquito, hendenan di edad avanza y esnan fysicamente incapasita. Laganan para dilanti y keda tira bista constant riba nan, vooral e chiquitinnan

Si bo bebe alcohol, zorg pa bo tin un asina yama “designated driver”, esta un hende cu no ta bebe cu ta stuur hibabo bo cas. Zorg tambe pa bo trailer, truck of caroza ta bon ilumina si bo ta bay transporte pa cas durante oranan di anochi.

Durante e parada, no subi caminda ni cana bay bin riba e ruta y sigur NO ora gruponan ta pasando. Keda riba e trailer. No stop e parada innecesariamente pa bo saca potret. Esaki ta ocasiona buraconan den e parada.

No tira botternan bashi of blekkinan riba caya. Despues di e parada laga e lugar caminda bo tabata pará limpi. No cambia lugar di e barricada y no tire abou. Keda tras di e barricada.

Reuni na tempo pa asina e parada por Sali na tempo. Sigui ordo di Polis y SAC estrictamente.

Zorg pa e coneccion entre bo trailer of Caroza y e vehiculo cu ta lastre ta adecuado. Tambe e mester tin un cadena di seguridad por si acaso e coneccion laga bay, pa e trailer keda pega na e vehiculo y no desvia su so bay causa desgracia den publico.

Zorg pa e tirenan di bo trailer ta bon. Corda ariba e spare tire. E carrozanan mester ta construi adecuadamente pa evita peliger pa hende.

Zorg pa bo tin un container cu suficiente awa pa e radiator, un aparato pa paga candela, un blekki di azeta pa motor y herment pa bo por hasi reparacionnan chiquito riba problemanan cu por presenta.

Zorg pa bo tin suficiente gasoline pa e no caba cubo na caminda. Si bo ta bay hiba container cu extra gasoline, wak pa e ta apropiado y warda na un lugar sigur (corda cu esaki ta trece peliger di candela!). Corda tambe cu mester tene cuidou ora di yena generatornan cu motor cayente.

Zorg pa durante e parada e gruponan keda sera y pa e grupo ta duna un impresion disciplina y ordena.

No stop pa sacamento di potret. Si e musica stop, djis sigui cana.

No tira botter, bleki of otro obhetonan duro den publico. No tuma bebida for di mirones cu bo no conose, pasobra nan por basha un droga den bo bibida.

No laga hende burachi dirigi bo grupo ni laga nan funciona como chauffeur di vehiculonan .

Durante e parada, paga bon tino riba muchanan chiquito cu direpiente por subi caminda.Corda cuida bo cellular y cartera ya cu hopi hende ta perde esakinan of nan ta wordo “ge-pikpokket”durante ‘last lap’.

No laga porta of bentana di cas habri. Sera bo cas bon

No laga jabi na e porta pega ni laganan scondi na “lugarnan secreto”. Ladronnan conose tur e lugarnan aki y ta hay mas liher cu bo ta kere.

Durante anochi, laga suficiente luz cendi rond di bo cas.

Warda bo pertenencianan di balor den un caha di seguridad na un Banco of instala un bon caha di seguridad den bo cas (kluis). Si bo no hasi niun di dos, no pone tur bo pertenencianan valioso na un solo lugar. Hasié mas dificil posibel pa e ladron.

Marca of graveer tur bo articulonan di balor y traha un lista di nan. Corda pa skirbi e numbernan di serie di cada aparato, marca, modelo, color y su prijs. Si ta posibel hasta saca potret di nan y tambe sigura nan. Esaki tambe ta hasi e trabou di recherche mas facil ora di tuma e keho y ora nan haya cosnan horta.

Semper duna keho na recherche ora nan hortabo of ora bo perde algo. Si bo no hasie mayan cu bo wak bo pertenencia un caminda of polis haya e ladron cu bo cosnan no por hasiele nada sin e keho!

Hiba tur bo placa banco!

Traha un team di vigilancia den bo bario. Laga un grupo bay wak e parada tempran, serca di e cuminsamento y despues e ta bolbe y laga e otro grupo bay wak e mas laat mas na cabamento. Si tin hende den bario cu no ta bay wak Carnaval ta mihor ainda ya cu no tin core core pariba pabou.

E vigilantenan mester regstra tur cos straño. Mester skirbi vooral number di van y trucknan straño den bario. Skirbi e numbernan bon. Describi hendenan sospechoso. Si bo sinti cu algo no ta bon, yama Polis mesora. No bay enfrenta hende bo mes. Nan por ta armá y nan por hasibo daño. Yama central di polis na 100 mesora.

Laga cachonan los den cura of den cas.

Cera bo auto na jabi y bay cu e jabi!! No laga e jabi di auto, cas, kluis, etc, na cas!

No laga ningun obheto di balor na bista, ni na cas, den cura of den bo auto. E ta yama ladron.